L’ané passé, la fé, dann nout péi, in gran sobatkoz dési lanvironman : demoun la sort partou pou vni, kisoi kozé, kisoi ékouté, kisoi lé dé an mèm tan. L’été galman l’okazion pou bann moun téi sort déor oir in pé kossa i fé issi pou défann la natir épi diminié la polision... Si lé bien ? Si lé pa bien ? Si lé possib fé mié... lé touzour possib fé in pé mié k’sak i fé in moman doné. Épi, i fo aplik règléman Kyoto !
Fé mié pou kossa ? Pou kissa ? Akoz sé nou, bann ti kolon, k’i doi fé mié ? Kossa bann gro vaza i atann pou fé mié ? I pé konprann in moun i koz konmsa, si la vi l’apré iz ali, fatig ali, lèrk li rann ali kont par li-mèm, in pé i fé pa lo l’éfor k’i fodré. Konmsi zéfor sé pou lé z’ot sirtou ou bien solman, épi zot, pèrsonèl, zot i anvoy dingé....
Akoz mi di sa ? Akoz ? Zot la pa lir sa don ? Oui, mon kouzin ! Mi sort lir, Prézidan la Frans, arienk pou son tourné-viré dan son l’avion pèrsonèl, i polié la natir konm in troupo 823 vash kan i larg di gaz dann l’èr... san konté son bat karé i agard pa nou... La pa arienk sa : i di ankor li sar shanj l’avion, pran in n’ot pli bandé, pou alé pli vit, pou alé pli loin... Alor, avèk sète-la va polié dé foi plis... dizon konm 1600 vash so kou issi.
A non ! La, la pa bon !! Tout so bat karé lé vréman itil sa ? I gingn pa diminié in pé ? Pars lé tro fasil anparl anou lo bon l’égzanp épi donn lo mové. Pars mi kroi pa sa lo bon l’égzanp sa !... Ditou Batis...

Justin