Konm moin, zot la vi koman la plui i done pou kasé sé zour isi. Konm moin, moin lé sir, zot la di, promyé foi zot i oi in plui for konmsa. Mé si zot i kalkil bien, é si zot lé pa né yèr, zot la fine konète kék gro plui dopi zot lé éné isi La Rényon. Pars, i fo pa obliy Nout péi nana in sézon pou bann plui é si i apèl ali konmsa sé ké la plui i koné tonbé isi shé nou.

Lé vré ké tazantan, dé foi, dopi in koup d’ané do suit la plui i ariv a manké é sé pou sa banna i anparl in défisit la plui… L’ané dèrnyèr, la plui la tonbé é pa pou fé sanblan mé la di nou lété an défisite. Bann la météo la mèm di nou lé dann défisite dopi in bon sonm d’ané. I fo dir, mi koné in bonpé péi i émré éte an défisite konm nou la. Pars défisite si zot i vé mé nou la pa dann dézèr ni domi dézèr.

Solman i paré abondans lo bien i fé pa d’tor, donk nou la poin pou anplégné sof ké ni amenn pa nout kanote konm k’i fo. Ou i antann la koup dolo par si par la, dolo lé jone konm pisa bèf. Ou i antan ankor dolo na koulèr shokola, dizon koulèr la bou. Alor in pé i ashté lo dann boutèye lo ziska pou kui manzé. Parl pi pou bross lo domino. Parl pi ankor pou boir sinploman…

Si ni fé l’inbésil, i fo pa di sé la fote la natir. La natir i vé anou d’bien, mé sé nou i ariv pa amenn lé shoz konm i fo.

Pli pir : dann bann gro plui konmsa dolo i déboul an lavalas dsi lo toi é arienk sa i sifiré pou donn anou in bon kantité d’lo. Kansréti pou kabiné. Pou lav linz épi pou lé z’ot komodité dolo i aport pou nou. Mé oila sé nou k’lé dann l’érèr kan ni lèss lo lo koul n’inport ou san ramas ali. A bien romarké sa i fé parti in bon politik dolo é zistoman nou na poin in bon politik dolo. Sé la k’lé shoz i klosh pa !