Zot la antann François Hollande yèr soir. Oté ! par kont té tar ; onz èr, prèsk minuit.

Donk, in sèl shinn : Frans sé pa konbyin, koréspon po nou Antenne Réunion.

Claire Chazal i poz kestion, mésié lo Prézidan i réponn.

La Siri : Li na répons po tout (normal, li lé o komann) ; anfin, avèk son minis Fabius, sirtou son arméman nikléèr, li pé koz dir. Li fé pèt in ménas po Bachar el Assad. Si i trouv pa ou sa i lé lo z’arm chimik, i anvoy l’armé fransèz po détruir ! La d’si, ban Riss pa toutafé dakor èk la métod, Sinoi non pli ; minm z’Alman, z’Anglé dan l’Érop i vé pa, i vé solisyon négosyé.

Achèv èk sa, z’Amérikin èk Obama i trinn osi lé pié ; donk la Frans i revir lo désizyon ; totos nou la pa pré !

Politik intérièr : po nout prézidan, tout lé bien kalé konm li lavé di dan sa kampagn élektoral : somaz, lozman, édikasyon, dépans piblik, rotrèt ; ninport kèl domèn i késtionn a li, li di li lé dan la lign son program avèk son Prémié minis Ayrault ; ben voyon !

Di a li Moscovici déklar lé in pé dan l’rouz : « ah non, pa di tou ».

Di a li la zistis, bann voiyou i tié Marseille i puni pa asé : « ah non, la zistis lé la po protézé, é èl protèz ! ».

Di a li — là Chérèque i vyin le 29 so moi si — vyin in pé voir isi si na poin bon pé domoun san lozman, diplomé san travay, rotrété dan la mizèr, minm la zol vyin voir si i mank pa gardien, profésèr (kréol) dan l’Édikasyon nasyonal !

Li lé a Pari, si inn ti planèt ; vréman, politik la Frans lé pa parey la-ba èk isi ; zot i di pa konm moin ?

Justin