Mi souvien, in kou moin la vi dann télé le mèr La Possession. Li té apré dir, dann son komine, nana in projé pou fé san lojman sosial. Mé solman, d’apré sak li di, méssié Préfé la désid kal le projé. Rézilta sé k’san famiy i atann in kaz, i gingn pa.
Méssié Préfé, daoir i fé pou répons, vik napoin an sifizans bann éstasion lépirasion, konm la loi l’Europ i prévoi, li pé pa lès konstruir le bann lojman. Mé léstasion lépirasion i kout si tèlman shèr k’bann komine lé riskab pa gingn fé. Mé pli pir, si bann komine i fé, sé bann konsomatèr va artrouv sa déssi zot faktir d’lo. Lèr-la, in bonpé d’moun va transpiré kan faktir va sorti... dizon zot va gingn lé pépiy !*
Donk na poin solision ? Donkalor, i fo arèt fé la kaz ? Épi débrouy le bann moun sak i atann in kaz avèk in loiyé solon zot ti-moiyin...
Poitan, solision nana : la pa bézoin fé bann bèl bébète éstasion, i pé fé sak lé pli pti. La Bretagne Sinni la fé in pti pou sisan-sinkant pèrsone. Sa sé in téknik... mé nana ankor in n’ot, sé sak i apèl le lagunage : bann plantasion i ansèrv pou lépirasion’lo sal.
Alor, si la téknik nana, si sa i kout pa si tèlman shèr, konm demoun la bézoin la kaz, kossa i atann ? Mi éspèr méssié Préfé lé pa apré rod in golaz* pou protèz ali kont la plui k’i tonm pa !

* golaz, sé in gran parasol blé pou anpar la plui.
* pépiy, sé in maladi volay ; i gingn korn sou la lang épi i manz pi.

Justin