Yèr dann zournal té i anparl lo saturnism, in maladi ou i gingn kan ou lé an kontak avèk le plon. La trouv bann zanfan la trap maladi-la dann in bidonvil Lo Por. Moin la antann sa dann in radyo, é lété drol la manyèr la prézante sa. Moin la mèm tandi dir, sa té in maladi bann marmay i gingn pi dépi lo "syèk dèrnyé".

La di ossi, sa bann zanfan maoré la gingn maladi-la, pars zot i rèss dann bidonvil. Toutsuit, dann déssèrtin radyo, in pé la komans dir sé pars banna, d’apré bann mové lang, i viv dan la salté. Épi nana Maoré, mé nana ossi bann Komorien, in pé lé an frode déssi téritoir La Rényon. Si i pous ankor in pé pli loin, lé riskab dir banna la amène maladi-la La Rényon.

La kiryozité l’amènn amoin alé rogard in pé déssi intèrnèt. Moin la trouv in déklarasyon méssyé Xavier Bertrand. É kossa boug-la té i di ? Figuir azot, nana katrovin-sink mil marmay nana maladi-la dan la France. Biensir, sa sé in maladi grav, vi k’bann médsin i doi fé déklarasyon. Mé na poin arienk issi na sa, é moin lé prèské sir na d’ote l’androi ke le Por na sa ou byin pli pir ankor. Pars afors polyé la natir, antass la salté partou, oubli pa na in n’afèr i apèl rotour !

 Justin