Donk mwin té apré ékoute in mami téi anparl sak l’ariv son pti zanfan, in marmaye la fé bon zétide vi k’apré lo bak li la fé in BTS dann la domotik... La domotik ! kossa i lé sa ? sinploman sa sé in bande métyé modèrn pou travaye dann batiman sansa dan la kaz pou fé lékonomi dann lénèrji, la tranzission énèrzétik, pou lite kont lo boulvèrsman dann lo klima, pou prézèrv la santé anfin in pé toute sak i fo pou protèz limanité par rapor toute la kouyonanade limanité la fine fé pou gaspiye lanvironeman.

Donk lo madam i rakonte son pti zanfan la pass in BTS an domotik dopi in an, li la marke son nom pole anploi épi bizarman i di ali in filyère konmsa i égziss pas shé nou. I égziss pa shé nou,Poitan ni oi bien batiman koméla,na poin arien pou voir avèk bande batiman lontan.Ni oi bien toute lé fé pou pa gaspiye lénèrji. Ni oi bien toute lé fé pou lo konfor épi la santé. Donk ni oi bien néna demoune i travaye dann la domotik i travaye issi, dann bande batiman dann la lite konte lo dérègloman dann klima.

Sa i krève noute vu :néna bonpé téknissien i travaye dann la domotik é bizar mé pole emploi-La Rényon, i koné pa zot.. Alor si i koné pa zot issi sa i vé dir i anbosh azot déor é si i anbosh azot déor sé pou zot vni travaye issi é sak la fé zétide issi, li déboute guète.L’ote lé bien péyé pars ,i lé pli kalifyé é sak lé issi lé pli kalifyé kossa i fé avèk zot ?Alé an franss, trouv in travaye sou-péyé épi manj la raj.

Mézami sa i rossanb lo gran ranplassan sa non ? i tir lé n(ote i anvoye déor, é i tir déor i anvoye issi...Mé antanssyon pangar lo rézin d’la kolèr, pars li va fini par arivé.

A bon ékoutèr, salu !