Solman néna in n’afèr ni doi rapélé, sé sète istoir d’vakssin-la. Kan déssèrtin la rande azot konte téi sava dékouv in vakssin révolisyonère, mi rapèl bien in bonpé d’moune la di i falé dékrosh lo vakssin avèk larzan. Té i falé déprotèz bande sogré d’fabrikassion d’vakssin épi fère vite, tèl fasson ké limanité antyère i pé pèrmète vaksine zot popilassion,

Si ni kroi bande syantifik, lo vakssin la pa pou vréman san pour san éfikass mé té i doi pèrmète élimine lo bande form grav la maladi... si mi kroi la possibilité néna trépé d’mor anparmi l’moune vaksiné i trap la maladi. Si sa lé vré pou vréman é sé sak bande syantifik épi bande médsin i di, pou kossa i rézèrv sa bande moune dann péi rish, dann péi demoune néna lo moiyin pou ashté ?

Pars lo vaksin sé in marshandize konm in n’ote ?

.. Konm manjé. Konm médikaman é si ou la poin larjan kontante aou avèk in takon d’malade, in takon d’mor. Mé oila la maladi-la sé in maladi virale é lo virus li lé kapabe muté, li lé mèm for pou sa. Li lé kontazyé, é bande kontaminé i pé pran l’aviyon konm lé zot moune… Pran l’aviyon ? Konm bande moune lo grand raid ? Konm lo moune sakifo ? É zot i pé amenn lo virus é i pé amenn galman toute bande virus muté.

Toute virus i mute, mé o moinss wi atak la maladi, opliss li mute é opliss la maladi avèk son bande kalité mutan i kontamine demoune. Alor kan téi di libère lo bande vaksin épi lo bande brové lété pa par bonté d’ame – in pé oui, mé d’ote té pars zot lété réaliste é zot té i konpran bien in viris épi son bande mutan mondyalizé téi pé ète batu dsi lo plan mondyal… Si toulmoune i done la min.