Mi pans zot i koné Alphonse Allais ? In lékrivèr komik fransé. In boug té kapab di li la invant lasansèr tout-étaz : ou i apiy dsi bouton sé lo limèb ki désann, ou i rant out létaz épi limèb i romont. Li té kapab di galman, li la invant in tass pou d’moun goshé. Aprésa, li la di i fo konstrui bann vil dann la kanpagn... Lé bizar sak li di, pars zordi, sé la kanpagn k’i rant dan la vil sirtou pou bann z’aktivité. Pa la promyèr foi ni koz la dsi, mé shak jour ou i pé aprann nouvèl konmsa kisoi dann zournal, kisoi dann télé, kisoi dann internet...

Samdi, mi rouv France-Inter, in gran matin, l’apré parl in ga la fé in park zanimo dann la vil Bagnolet. Lo park lé kosté sanm lékol épi marmay i vien pou karès la tète bann mouton épi bann kabri. Mèm ké lo bann zanimo i ansèrv kantonyé vik zot i manz lo zèrb é zot i ansèrv débrousayèz. I fé osi fromaz lé kabri, sansa lé mouton. Dann in n’ot vil, mi rapèl pi lo nom, la komine la fé donn demoun volay épi lo volay i manz bann déshé manjé si tèlman k’i diminuyé la kolèk zordir, ziska vin pour san. Moin la fine anparl osi la plantasion dann sak pandiyé konm i fé dann l’Afrik, sansa dann po, sansa ankor dsi balkon. 

Dann zournal somenn dèrnyèr, la amontr lo mèr Lo Por apré sign kontra pou dévlop lélvaz moush a myèl la kaz demoun. Moush a myèl, i fé d’myèl. Armète èk sa, an vil i paré lo myèl lé méyèr ké dann la kanpagn sirtou pars na poin produi shimik. Sa la pa in n’afèr nouvo vi k’ mi pans zot i koné nana moush a myèl dsi lo toi Konsèy réjyonal Montpellier, mèm dann Paris, mèm dann bann gran vil amérikin. Moin la vi in roportaz, dsi la vil New-York, in pé i fé ban gran gran zardin i ède azot zoinn lé dé bout lo moi par l’milyé.

Dakor, mé pou kosa mi di sa ankor ? Pars, d"’apré moin na moiyin dévlop nout bann prodiksion lagrikiltir dann bann vil épi dann bann vilaz. Konm di bann zorèy, sa i pé mète de bèr dann zépinar ! Akoz, pars bann famiy i pé mèm si zot la poin la tèr produi brède, piman, kotomili, tizane... pou zot konsomasion épi pou zot vann in pé... L’èr-la, mi pans sa in manyèr vanj in pé kont la mizèr, é angant demoun pou dévlop zot prop travay.

Justin