In jour, in dalon la di amoin, i mank pi ké F. Hollande i ramas lo frui amèr Sarkozy la planté. Moin la réponn ali, na poinn rézon, sof si i fé pa la riptir avèk l’ansien politik. Zot i konpran pou kosa, moin té i di sa, san tro kroir pou vréman. Pou kosa ? Pars lo mèm sistèm kapitalis lé an plas, pars la plipar d’péi la anbèk dann la mondyalizasion, anfin pou nou Rényoné lo mèm sistèm l’anprofitasyon l’apré fatig anou.

Dann in ka konmsa lo gouvèrnman i ashète sak i apèl la pé sosyal. Giscard la donn larzan karné. Chirac èk Mitterrand la donn l’égalité anfin sak i apèl l’égalité. Tout la bann la baz dsi la défiskalizasyon. Sarkozy son tour la promète anou lo dévlopman andojène, èk la boush, solman èk la boush. François Hollande galman nana son plan. Ni koné bien plan-la vik nana son soisant mézir, plis trant mézir pou l’outre-mèr. Arzout èk sa sak li la di dann son diskour Sin-Loui. Boudikont, in plan pou toutsuit, in plan pou domin, é in plan pou l’avnir donk pou lo dévlopman.

Lo problèm zordi sé la kriz, la kriz la dète, la kriz lékonomi sak la Frans, sak l’Erop, sak l’apré fain bonpé bann péi, épi lo moun. In légzanp : troizyèm trimèst lékonomi lé an pane, èk in kroisans, zéro pointé. Na in pé péi lé an rékil, épi sak lété bien lansé, lo motèr i komans kalé. Gro problèm ! Mé kèl solisyon ? La rolans lékonomi épi la diminisyon la dète ; dakor ! Mé kisa k’i pèy tousala. Tir dan la posh bann rish ? In komansmannn solisyon. Arète trang bann ti-kolon ? In pti bout la solisyon. Rolans lékonomi ? Oui, mé tout ansanm, pa shakinn son koté. Pa pou fini èk la kriz, pars lo sistèm kapitalis, ké lé an kriz, mé zis pou apèz in pé si i vien abou !

Justin