Mi koné pa si zot la byin suiv tout la kanpagn zéléksyon rézyonal. Mi koné pa si zot la pran lo tan pou konprann tout lo léskandal sondaz. Pou mwin tousala lé loush. Koman sa, in zournal i pé sort a nou zordi ké nou lé kaoukoun èk 4 pour san é lo landomin in ot zournal konkiran i anons nou sar an parmi bann tirbo. Alorss kiswa sak la fé lo promié létid la bwar pétrol, sinonsa li la bwar lank pétèt minm li lé in pé malfondé. Mon lidé a mwin, li dwa plitot èt in pé malfondé.

Ki pé krwar ké nout lis“Pou in Rènyon nouvèl“i sar fé aryink 4 pour san. Son tousèl, dan son kominn nout kandida tèt de lis lé kapab sontousèl fé lo 4 pour san. Pou triké néna in manièr poz kestyon. An vérité, i di lo boug la ponn lo sondaz, i di li lé kosté èk Didiér Robert, li fé parti li osi di rézo “Kopin-Kokin“. Lo prézidan la rézyon i travay bon pé èk son linstiti i di. Kan i di sa, astèr ni konpran mié.

I rèt a nou in zour pou kontinié ésplik domoun lo rol in zournal, an minm tan di osi, poukoué i fo arèt èk “lé mwayin ilégo“ konm di nout kandida. Dann so zistwar sondaz, byin sir in zournal privé i pé awar son shwa, mi andiskonvyin pa, sak lé pli grav sék lo sérviss piblik, la radio konm la télé, i rann a li konpliss de tousala. Nout kandida la di “Dimansh 6 ni dwa alé voté, ni dwa ala voté Pour in Rènyon nouvèl“ . E pou arèt èk la politik“kopin-kokin“