Biensir lo kat ti-mo mi ékrir dann nout zoinal i pèrmète pa mwin rofé in poin dsi in drame la spass dopi sinkantan talèr é tou-t’ in pèp la retrouv ali éxilé dann plizyèr péi zot i koné pa, san in toi dsi zot tète, san in métyé pou zot égzèrssé é boudikont san in solission pou gingn zot vi.

Bann shagossien i di touzour : « Nou la kite nout paradi pou retrouv anou dann in anfèr » é lanfèr-la lavé pou nom lil Moriss, lé Sésèl dann in tan la vi té dir pou tout demoune bannzil loséan indien.

Issi la Rényon nou lé nonbré a vanj avèk bann shagossien pou pèrmète azot amenn zot bataye passifik pou rotourn shé zot. Shé zot ? Lé pa si loin ké sa-dé mil kilomète dann nor-est La Rényon landroi bann grann puissans la instal in gran baz militèr dann lil Diégo-Garcia, épi sa i pèrmète azot — sirtou bann zamérikin -amenn la guèr kont bann pèp loséan indien.

Mé ni koné bann shagossien la zamé rononss lo droi rotourn dann zot péi épi viv laba grankèr zot lékonomi tradissyonèl épi zot kiltir. Problèm : Shak foi ké bann shagossien lé an pozission pou rotourn shé zot, shak foi néna in lévènma oi anpèsh azot arivé.

Dèrnyé épizode : moi d’mé 2025 Moriss avèk Roiome uni i désside ariv in akor pou bann shagossien rotourn shé zot mé kan i panss lo kalvèr shagossien i ariv o bout néna in lanpèshman é lanpèshman-la sé in pèrsonaz Prézidan bann z’USA é k’i fé toute zordi pou langlétèr i pass pa in loi pou rann Moriss bannzil shagos.

Mézami mi sort aprann lo nouvo kontrotan pou bann shagossien dsi la késtyonn zot rotour. Konm toute bann rényoné i soutien la koz Shagoss mwin lé dékonsèrté, mé mwin lé pa dézèspéré — la lite i kontinyé é pou nout amityé avèk bann shagossien ni doi kontinyé la lite-la ziska la viktoir bien antandi.

A bon antandèr salu !

Justin