Trann-kat grévist la faim !
Dépi moi d’zilyé, dann péi Chili, trann-kat prizonyé politik mapuche la komans in grèv la faim. Bann Mapuche, sa bann z’indyin. Nana par-la in milyon d’moun konm sa dann péi Chili. Pars zot i domann k’i rann azot z’ot téritoir bann Chili la pran de fors, pars zot i vé k’i rokonète z’ot l’idantité mapuche, la répons lo gouvèrnman, sé la réprésyon. Alors, zot la mète an grèv la faim.

La loi kont bann soi-dizan téroris
La réprésyon avèk in loi kont bann soi-dizan térorist k’i sousyé pa lo droi la défans*. Pinochet la fé loi-la kont bann militan la gosh. Apré sa, bann gouvèrnman, gosh konm droite la kontinyé aplik so loi-la bann z’indyin mapuche. La-ba, dann Chili, si ou lé Mapuche, si la polis i déside rode lo pou dann out tète... ou lé koupab. Sa lé otomatik.

Dann dé-troi somène bann minèr va sorte dann z’ot trou. Nou va oir dan kèl éta. Va fé la fète, va done kado, toute demoun sar kontan sansa va fé sanblan. Bann militan mapuche zot, va atann z’ot prosé avèk la kondanasyon o-bout. Pou zot la lite i kontinyé !

* In loi fasis. Nana mèm dann prosé bann témoin "anonyme" k’i akiz mé pèrsone i oi pa zot é i koné pa kissa i lé. Lé drol, mé dan la Frans ossi nana in loi konmsa ! I aplik sa kont bann ga dann bann banlyé.

Justin