La min i pé fé bonpé zafèr avèk, mé a in kondissyon sé k’i mète lo dé min ansanb-avèk souvan défoi, é mèm lo pli souvan i fo mète lé dé. Bien sir in sèl min l’assé pou lanss in gronad péi mé na pwin sa solman dan la vi. Dann nout kozman i parl bate la min, aplodir. Dann d’ot i di in min i lav l’ote é sa sé in provèrb i porte dsi la solidarité.

Agard demoun apré travaye : in min néna in rol, l’ot min néna in n’ote. In min i ékri, l’ote i tienbo kayé. Bann péshèr i ansèrv lo dé min pou romont la lign. Pli pti lopérasyon si ni vé li lé fé an sékirité sé lo dé min ké d’moun i ansèrv.

Sa i vé pa dir in min ni ariv pa fé arien, mé avèk dë min, lé pliss éfikass, pliss an sékirité é si ni sava oir pli loin, dann la sossyété tousèl wi pé f dé shoze mé ansanb-ansanb wi pé fé pliss sa é in n’afèr i fo pa obliyé. Solidarité mé frère : néna in shanté i di sa.

Alor ? Alor, mi kite azot rofléshi la dsi é ni rotrouv pli d’van. Sipétadyé !