Mé zami, mi koné pa si l’androi zot i lé zot i antann kok shanté. Pétète zot néna so shans-la ! Mé dann in sosyété irbanizé, i antann moinzanmoins kok shanté. I parétré sa i déranj lo moun. Oté ! Lo moun koméla lé déranjé fasilman oui. La klosh i sone i déranj azot, loto lo voizin i fé tro dézord pou zot, lo kok lo voizin zot i rèv foute sa dann zot marmite. La mizik ? Kèl déranjman. Koup zèrb i jène azot. Bin alor, si ou i antann pi kok shanté kosa i fo fèr ? Pars si ou i lèv tar la parèss la fine pèz dsi ou é out lénèrji la fine komans fou l’kan. Si ou i lèv bonèr gran matin mèm ou i done lo sans out tan-ou i mète ali dann raye travaye é sa, sanm pou moin sé in bon n’afèr. Vitman l’matin, vitman l’apré midi. Mé sirtou pa : dousman l’matin, pa tro vite l’aprémidi konm i di dann la shanson « Ti rojé i marsh a krazé. » Alé ! Mi kite azot pou fé zot rofléksyon pèrsonèl la dsi é ni artrouv pli d’van. Sipétadyé !