In boug la di konm sa, pou in moun de gosh, kiswa pou in progrésis, kiswa pou in sosyalis ousinonsa in kominis, si in moun de gosh, souvan’dé-fwa minm in travayèr, i vot pou la drwat “sé konm si in dinn i vot pou noèl “. Mi trouv pou mon par, ala in kozman ziss. Mi wa la ba déor apré zéléksyon dimansh néna sar oblizé vot konm dinn vik boudikont, dann in bonpé landrwa lo kandida sosyalis i dwa rotir son lis pou fé baraz kont lo fron nasyonal.

Kèl sityasyon konpliké pou in travayèr ? Oblizé swazi rant la drwat, é rant lo fron nasyonal. In ot boug la di osi, sad la lé plito byin avizé, li di konm sa, daborinn pouk lo travayèr i konpran in pé mié la sytyasyon, li di konm sa fok la drwat li minm i ésplik a nou kèl diférans néna rant désertin drwat èk lo fron nasyonal, konm si pou désertin sé kif-kif bouriko.

Mandoné lo momon poul i rotrouv pi sonm p’ti. Minm si pou lo léléktèr, lo léléktris lo shwa i riskab èt difisil, dimansh sof koman-koman ni dwa alé voté. Minm si néna lé an dé kèr, minm si lo kèr i fé défo par moman, lé initil tyinbo rankinn, Minm si pou désertin sé kif-kif bouriko, dimansh ni fèrm lo zié, ni pins lo né, ni boush zorèy, ni sar voté.