Na poin lontan mi koné sé Élie k’i port kandida zéléksyon bann dépité éropéin. Dizon, lété dimansh onzèr moin l’kar : moin té i vyin pou in gran rényon i komans dabitid dizèr. Rozman zour-la la komans pli tar... Dan la rantré, in pti mamzèl la done amoin in gran foto nout kandida Lalyans épi in zournal "Témoignaz". Moin la di mèrsi byin, pars mèrsi-la, sa i korsh pa la boush sa !

Élie i di zéléksyon-la lé inportan ; donkalor lé normal i mète in kandida inportan. Sa sé moin k’i di, vik mi pans Élie i préfèr demoun i mazine li sé in pti kolon. La pa d’zordi mi konète ali !...
Lé z’ot kandida i di ossi : sa in zéléksyon inportan ! Si tèlman lé inportan k’banna la mète bann kandida dézyinm plan, in bann sogon kouto, par l’fète.

Sa lé vré pou lo bann droite konm pou la bann sosyalis, épi d’ot ankor. Moin na in kamarad instruiyé, k’la pa parti lékol é pa aryink devan baro, k’i ésplik sa i apèl in "paradoks rényoné !".
Mi koné pa tro sak sa i vé dir avèk présizyon ! Mé mi pans i vé dir apépré : ou i énons in règloman, apré ou i tynbo pa kont, ou i anvoy fèr fout. Ou i répèk pa out gran prinsip !

Pou mon par, moin noré pa èm port kandida dann in zéléksyon konmsa, pars moin sé in sogon kouto épi lo zéléksyon lé inportan.
Dézyinm rézon : sé pars mi koné pa tro byin bann règloman Lérop. Mé mon kamarad Boush-an-fé la di amoin, li la antann bann kandida-dézyinm kouto koz déssi Lérop é, solon li, banna lé mir, é pliské !
Moin la di lo Boush-an-fé, mi profèr tak mon baro, plito k’rouvèr mon boush é di aryink la "çoneri" san sédiy...

Justin