Bon ! Zot la fine bien manzé ! Pétète zot la boir in pé - konm k’i diré avèk « modérasion ». Si zot nana in pti problèm, oubli pa néna bon zèrbaz kont léshofman, marizolène, pou abate in pé lo nèr, pou dégaz in pé lo foi.
Mé par l’fèt, pou kossa mi di azot sa ? Somanké, zot i mazine moin l’apré ral lo kèr déssi z’ot bon manzé. Alé oir, la pa vré ! Sé zis pou dir azot, si zot la fine arfléshi pou kossa nana infèt dé mèr. In ? Zot la fine arfléshi ? Pa tro ! Bin rozman pou zot !

Sré t’i pa in pé akoz dann déssèrtin péi lavé konm in mank dann la démografi. Konmsa, té in pé pou ankouraz demoun fé zanfan. Sré t’i pa galman pou di bann madam pou kossa i kont déssi zot : pa déssi zot lintélizans, sansa z’ot zantiyès, mé pou fé zanfan, konmsa si nana la guèr, i mank ar pa solda.. La, mi san in pé i komans ète an kolèr kont moin.

Pran pa la kolèr, m’a di azot sé plito akoz zot i èm z’ot momon, épi z’ot momon i èm azot. M’a dir azot ankor, sé akoz bann zanfan i èm ète an parmi avèk z’ot momon. Si fanm sé poto mitan lakaz, alor sa i tonm bien : bann zanfan é bannn pti zanfan, épi bann arièr, tousa i fé lo ta, i group an famiy avèk z’ot momon, z’ot granmèr, épi z’ot gromèr.
Tanpir si so zour-la, bann komèrs i fé larzan déssi z’ot do, provik pou nou, sa in manièr di nout momon, nout granmèr, sansa nout gromèr, nout lamour.

Justin