Koméla, demoun i amen tout sort shoz ninport koman. L’abolisyon l’ésklavaz ? Lo zour magazin i rèss aouvèr pou prépar la fète Noël. Promyé mé, fète travaye ! Parèy, in zour pou tir in pé la parèss sansa pou alé travaye o noir... Tout zour fèryé sé pou fé la fète, an obliyan tout bann viktoir sosyal bann travayèr la gingné so zour la.

Bann fète rolijyèz i vien konmsa galman. Mi souvien, in foi, lo prète té apré di an parlann Pak-i ariv sa biento - é li té i di son bann fidèl, i fo pa obliy zour-la Zézi la résisité apré an avoir été klouté dsi la kroi... I pé mèm di, sa i éspass in pé parèye dann tout rolijyon. Mèm bann fète nasyonal i vien konmsa koméla. Demoun i obliy lo sans vré d’in fète, sansa d’in l’évènman.

Lé bien domaz pars si nou téi pran pa tout zévènman konm ni pran koméla, mi pans sré in l’okazyon pou nou arviv in pé nout l’istoir, sansa rafréshi in pé nout mémoir sansa ankor nétoiye in pé nout mové pansé initil. Olèrk pans solmann komèrs, manzé, la fète payènn épi lo rètan dé shoz.

Yèr té la fète la fam ! Poitan non, lété pa sa ditou sa ; lété la fète la lite bann fanm pou trap zot droi, épi pou prépar bann viktoir pou ranport domin. Dan la lite biensir ! Pars i gingn pa arien san la lité, san lo konba, san pran lo risk ramass lo kou. Lété konmsa pou nout vyé z’ansète, lété konmsa pou nout zansète, lété konmsa galman pou nou é sar parèy pou tout bann zénérasyon va vni apré nou.

La pa solman pou fé vann in pé bijou ! La pa pou gonf nout vant avèk bann viktuaye. Mé, sanm pou moin, pou donn anou kouraz pou bann bataye é pou bann viktoir ni vé ranport domin.