Matante Zélida la ékrir Justin :

Mon shèr nové, mon spès salté, rouj-de-fon dovan l’éternité,

M’a dir aou in n’afèr : oplis nana zéléksyon, oplis i rosanm bann kandida na poin aryin pou dir. Moin lé jiska pou demandé pou kosa in pé i sava prézant zéléksyon. In komèr la di amoin konm sa, si té i pèy pa zindamnité, lé plis ké sir nora poinn kandida. Moin mi koz pa konm sa, pars d’apré sak mi koné, bann zélu nana moiyin fé pèy azot an misouk par bann lantropriz i ranport bann marshé : kisoi pou aprovizyone la kantine, kisoi pou aranj shomin, kisoi ankor pou ashté bann biro, bann mèb épi lo réstan. Donk, moin lé sir zot posh nora pa rès plat. Poitan, si bann zélu i gingn in salèr, sé zistoman pou évit azot trap larzan d’si bann marshé piblik.

Tout fason, konm di lo kont, sak i bat dobèr i lèsh son doi. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

Sak ou i di i étone pa moin, pars sé sak mi antann dann radyo trotoir tou lé zour ké bondyé i anprèt anou pou viv d’si la tèr. Mé si ou i réfléshi bien, nana dé shoz a fèr kan ou sé in zélu, kisoi lo mèr, kisoi le bann zadjoin, kisoi ankor kan ou lé dann in majorité Konsèy minisipal. Akoz pa kan ou lé dan lopozisyon ! Mé mi koné in moun i prézant ali zéléksyon par vanzans pars lo mèr la pa done ali in satisfaksyon, pli pir, pars li té konm in viktime lo arsèlman. Ou va di amoin sa lé pa onorab, mé sé kant mèm in rézon. Mi koné in n’ot la désid prézant ali zéléksyon pars, sanm pou li, li pé fèr in nafèr pou d’moun mizèr konm lé di dan la shart l’Érmitaz : in bone intansyon, mé mi pans pou in rézilta in pé limité, vi ké lo bann bidjé kominal, la posh lé in pé plat sé tan si... Mi koné in n’ot la di amoin konm sa, son soué sé fé in nafèr pou marmay lékol, pou fé travay azot in pé myé, épi in n’ot ankor i vé okip bann vyèy pèrsone, kisoi dann in foiyé, kisoi dann zot ti mézon. Nana osi sak i rèv fé in bon bidjé la komine : dépans moin posib pou fé lo maksimom de shoz... Pou mon par, moin la toujour rèv fé port léfor toulmoun pou lo dévlopman lo péi, pars si i kontinyé konm i kontinyé, lo péi va kapot dann kanal, é i fo pa ni ariv là, vik’nou lé byin mal angajé. Tok ! Pran sa pou toi !

Justin