Sü débarkadèr, nana in pti marmay. Son sèl bon linj sü lü. Son pti shien dann son bra. Li sava sü son gro-mèr, lï di : « Gromèr, moin lé malad, mi sava Sésèl pou artrouv mon santé. Gardien bien mon pti shien, m’a okïp ali kan m’a rotourné. » Ala lo marmay i anbark sü in bato la kok lé noir, i ansèrv solman pou transport la noi koko. La mèr lé mové. Na poin in landroi aménajé konm ki fo : zis in sézi atèr sü lo pon. Li ranvoy, tanpir k’lï pë.
Astèr li lé géri. Li arpran bato pou rotourn dann son péi. Solman lo bato i sar pa dann son péi, i larg ali Moris. Son gromèr lé la sü lo ké. li di : « Gromèr, mi oi ou, solman mi oi pa mon pti shien. kosa l’ariv ali ? Ousa nï lé, Kosa l’ariv anou ? » Son gromèr i réponn ali : « Mon zanfan, nou lé déporté astèr. I fodra lïté pou artrouv out Pti Shien ! » Chagos, Diégo-Garcia, Perhos Banos, Salomon bann nom k’i shant dan zot tèt, zot léspoir, bann nom i fé mal dann zot tèt, zot soufrans, zot martir. Sa in zistoir pou bann kamarad Chagos, bann zanglé, bann zamérikin la déporté. Banna la kas zot kaz, la tié zot shien, la anpèsh azot antrotien la tonm zot bann famy pou fé konmsi Lavé poin n’moun dann zot péi.

Justin