Sanm pou mwin lé pa zordi la vèy pou war in planèt prop. Poitan ni an parl zour an zour, néna i organiz conférans si konférans, tanto nora in konférans nasyonal si lo klima fin d’lané, sanm pou mwin tousala lé konm si ni vé vid la mèr èk inn ti mok sardinn, vik bann gro-gro zozo i sanfoudsa, bann gro-gro zozo i kontinié polié. Sak lé pli grav, sék banna i kontinié polié an misouk an kashièt. Dopi yèr ni apran, in gran mark loto, sak banna i prézant a nou konm lo méyèr, lo niméro in i di.

Pou vann in takon loto partou é bin li la nyabou trouv in sistinm pou fé diminié son kantité gaz léshapman. Sa zis kan i kontrol. Moman i kontol son kantité co2, lo fabrikan la instal in laparèy, zot i apèl sa in lozisyèl, i mèt sa si loto diézèl é so laparèy la i pérmèt anil lo sistinm kontol si bann zafèr polian èk bann loto. Sa lé zis pou lo kontrol aprésa lo lozisyèl i ansèrv pi, aprésa i kontinié polié. Lé diabolik lo zafèr. In lajans pou la protéksyon lanvironnman la dévouv lo po.

Konm lo shantèr i di “éské so mond la lé séryé pou vréman“ ? Ni wa zordi ziska ousa banna lé kapab alé pou fé larzan. Mwin la vi dann télé mwa dérnié, banna la fé férm in réstoran, zot konzélatèr té i donn pa lo dogré nésésèr pou konsèrv la viann. La pa di si navé in lozisièl pou fé bèss lo dogré d’tanpératir. Lo kontrolèr la di konm sa odrémié férmé sinonsa va anpwazonn domoun. Sanm pou mwin néna zanpwazonèr èk zanpwazonèr, sèd la lé diabolik !