Si ni akout bann komantèr, kiswa komantèr radio, kiswa komantèr télé, kiswa politolog pèi, kiswa politolog déor, kiswa la gouyav de frans, kiswa dovinèr gro dwa, kiswa batèr kart, kiswa sondèr pèi osi, pou zot lé karot son kuit, konm di lot, pou zot, lé shoushou son bouyi. Tout, alé marshé don. Tout, alé pous bèf dann la monté bél èr. Konm nout kandida i di, lo mash ofisièl sé lo 6 èk lo 13, aprésa, na fé lo kont. Pou lèr balon lé ron, pou lèr ni mèt balon o sant.

Lé vré pou vréman ni vann pa boudin dann vant koshon, ni fé pa la bou avan la pli, mé ni pé di zordi“ni bouz ankor“konm di bann la ot, nan déplèz a désértin“Ni bouz ankor. Nout kandida la di“Aryin d’séryé i pé èt fé san lo parti kominis Réyoné“Nou lé la. Konm tousala lé fé d’si la baz la valèr réspè d’shakinn, PCR-Progré, Progré-PCR, boudikont shakinn néna réspè pou shakinn, donkalor fo kont èk nou.

Mwin la byin antandi kozman nout kandida d’si nout léstati, d’si lonm rèyoné, d’si nout dévlopman, d’si nout somaz, d’si nout rol dan la zon. Li di i fo dévir lo do èk sak i fé isi dopi in bon koup de tan, i fo dévir lo do èk la politik lintégrasyon i aminn a nou dirèk dann mir. Mi pran dan mon lidé, ziska mwa désanm ni dwa pass kaz an kaz pou garanti in viktwar nout lis “Pou in Rènyon nouvèl“Konmsa na fé manti bann politolog gatèr !