Mi pans, konm moin, zot i sava tazantan, mèm bien souvan, dsi l’internet pou suiv in pé bann sizé k’i intérès azot in pé partou dsi la tèr. Mi pans galman désèrtin rant zot i sava in pé dési sak i apèl bann rézo sosyo konm face-book pars i artouv ankor bann sizé d’aktyalité épi in bann kozman ladi-lafé dsi l’aktyalité. Sa i vépadir-konm dsi Freedom - ké lo bann z’informasyon lé sèryé toultan. Antansyon, mi di pa ké la pa sèryépou la pèrsone i téléfone, sansa sak i mète z’ot komantèr, mé souvan dé foi sé in manyèr oir lé shoz, konm i di, par lo pti bout la lornyète.

Solman, mi pans konm moin, zot i doizète dann la difikité pou sépar lo vré avèl lo fo. Zot i vé in l’égzanp ? Kosa k’i éspas pou vrémn dann in péi konm La Syrie ? Si ou i ékout bann médya l’oksidan ala in gouvèrnman k’i bonbard son pèp san ménazman. Si ou i ékout d‘ot médya sé bann gran péi oksidantal k’i donn lé z’arm bann téroris é aprésa banna i port la guèr dsi z’ot prop téritoir. Si ou i sava rode bann z’informasyon dann la télé, lé ankor pli pir : nana lo blan épi nana lo noir. Sanm pou moins é in l’informasyon dézoryanté !

Kansa va oir in pé klèr la-dan ? Pa zordi, pa domin pars bann mashine pou mantir i tourn lo zour konm la nuite. Sak lé sir sé k’lo zour v’arivé é n’ora in gagnan épi in pèrdan. Sak lé sir galman sé ké bann jihadis armé va rotourn azot kont z’ot protéktèr é so zour-la la guèr va shanj lo shann bataye é so zour-la, moin lé sir lo mashine pou mantir va tourn ankor lo zour konm a nuite pou fé prann anou po d’shanm pou pla kouvèr, makaroni pou la bouzi.