Oté

Pou fé romont la kolèr laté in bon rényon ! Fransh vérité !

Justin / 4 désanm 2018

JPEG - 43.6 ko

Dimansh aprémidi moin lété dsi la plass la proféktir é konm moin la fine dir kékpar, madam Girardin lété dann Pari é èl té présé fini avèk lo bann moun alé oir sé èl mèm la propoz diskite avèk lo bann moun par vizyo. Solman èl lété si tèlman présé ké la diskisyon la pa port ditou dsi bann propozisyon bann moun té la.

Momandoné la di : « Néna vinn kat késtyon, inn par komine, vi k’néna otan ksa isi La Rényon ». Donk moin té i kroi té i sava poz lo vinnkat késtyon avèk dé mo d’répons bien étidyé, bien kalkilé par la ministrèz. La mèm pa poz inn épi la ministrèz la pa réponn in sèl vi ké koman ou i sava réponn in késtyon si poz pa. Donk la pa débate de riyin é lété pa étonan si kan la fini le moun la plito shofé ké parti pli trankil.

Moin mi fé pou romark : si i roganiz in rényon pou kalm lo zé ébin i pran lo métod kalm lo zé é i pran lo tan k’i fo. Si i anploye lo métod shof lo bann zésptri ébin lo bann zéspri i shof-i pé pa ète otroman k’sa... Aprésa, kan in zilète zone la di : « Madam la minist mi domann aou dé mézir for, tout suit pou toutsuit, dann ine èr si posib é si ou i done anou sa dann ine èr a popré ébin ni garanti alé raport sa avèk lo moun ».

Minis la réponn : i sava pa shanj la règ lo jé shak instan. I fo solman done amoin lo tan pou étidyé lo bann mézir. Otroman k’sa i gingn pa vi ké lo promyé minis la konvok gouvèrnman é konm moin lé dann gou vèrnman i fo mi sava. Lo lékran la tinn, épi lo bann zilé zone la parti fé wati watia zot koté.

L’èrla la kolèr la romonté olèrk tonbé pou vréman. Epi ala roparti pou in tour. Avèk in plan B ? Pèrsone i koné pa. An touléka lété roparti pou in sominn ? Sa I koné pa d’avans sa. Avèk in risk kalkilé ? I koné pa non pli. Final de kont si ou i vé fé romont la kolèr d’moun néna poin méyèr métod ké sa. In bon rényon pou an vérité pou fé sak lila fé.