Samdi dèrnyé lété lo sèt désanm é si zot la rogard bien zot kalandriyé, zot la sirman romarké zour-la té la Sint-Anbroiz. Sint-Anbroiz ? Oui lo patron bann z’élvèr moush-a-myèl. Soir-la moin lété Sint-André pou in fèt batème. Donk, moin lété asiz koté in moun té apré rakont in gayar zistoir dsi Sint-Anbroiz zistoman. Sa in moun la viv dann l’erop rant 340 épi 390 apré zézikri. Donk lo zistoir lété sak mi sava rakont azot tout suitman.

Anbroiz té ankor in pti baba kan in voyaz moush a myèl la poz dann son bèrso, la rokouv son kor an antyé. Arzout èk sa téi rant, téi sort dann son boush konm moush dann in rush. Son papa, in lanpérèr -si mi tronp pa- kan la vi sa, la di konmsa si lo zanfan i mor pa, li va fé kékshoz gran dann son vi. Lo baba lé pa mor, la grandi la dévni évèk épi in gran konèsèr la syans Bondyé é an mèm tan in gran lékrivin épi in gran tradiktèr... Pandan i bon bout lo tan, moin lé ékout ali épi moin la koz avèk li dsi la késtyonn moush-a-myèl, dsi lélvaz moush, dsi bann produi la rush -pars la pa arienk do myèl i tir dann la rush- i tir osi lo polène, la zélé roiyal, la sir, é tout in kantité zafèr i ansèrv médikaman. Solman antansion èk bann maladi épi l’anpoizoneman bann moush par désèrtin z’insèktisid. An ékoutan lo boug, dann fonn mon kèr moin té i pans na dmoun intrésan dann mon péi, é nana vrémann dmoun i pans l’avnir nout pèp. 

Pou finir, m’a rakont azot in malèr dann la rush. Bann butinèz i sava fé zot travay kisoi pou alé rod lo néktar, kisoi pou alé rod polène -polène sa i sèrv pou done manjé bann ti larv zabèy. Mazine in kou lo group butinèz i tonm dann in niyaz z’inséktisid, soi zot i mor dank zot i ramène pi lo manzé banna i atann dan la rush. Soi lo produi i soul azot, i afayi zot nérone, é zot i pèrd lo sans l’oryantasion, zot i artrouv pi zot rush. L’èr-la, bann gardien, kan zot i oi lo produi i rant pa, alé konprann pou kosa, zot i tyé lo bann larv é tout in ponte la rène i pé ète pèrdi pou karant zour... Alé ni rotrouv ! Si mi di azot sa, la pa pou rann azot tris, sé solman fé travay zot koko dtèt dann lo bon sans k’i fo.

Justin