Yèr matin, moin la trouv in bon dalon moin té pankor vi dopi in bon koup de tan. Nou la koz-kozé konm d’abitid, nou la anparl nout problèm, nout bitasion, l’avnir nout péi, nout kiltir. Rant nou lé konm sa, dopi la vi la done anou la shans bit inn avèk l’ot.

Momandoné, li poz amoin késtion dsi nout kréol rénioné. Li domann si d’apré moin, nout lang kréol la avansé sansa non ? Mon répons té klèr é nèt : nout lang kréol la avansé, kisoi dan l’ékol, kisoi dann la kiltir. Nou la avansé pars nana bon zouvriyé la fé bon travay. Mié k’sa, nout kréol lé moin an maronaz konm avan, mé firamézir, li trouv in plas dan la vi ofisièl, é sa sé in bon nouvèl pou nou. L’èr-la, mon bon dalon i di amoin, li osi, li pans nout kréol la bien avansé.

Aprésa, ni diskit in pé dsi lo pti pé k’ni koné dsi l’il Moris, dsi Sésèl, dsi Rodrig épi bann Chagosien. Lé drol, mé ni apèrsoi, shé nout bann kouzin osi, zot lang kréol i avans. In l’égzanp ? Mi sort lir dann in zournal Moris, trann-dé amontrèr i sort gingn zot diplom ofisièl pou amontr kréol morisien dan l’ékol. La formasion bann amontrèr, sa in n’afèr inportan.

Pou gagné kont ki ? Kont pèrsone. Sirtou pa kont lo fransé épi l’anglé, épi d’ot lang ankor, mé pou anrishi anou, nout l’édikasion, nout formasion, nout kiltir. Pou gagné kont koi ? Kont bann pir l’énmi : l’ignorans, la mizèr kiltirèl épi d’ot shoz ankor k’i anklav nout l’éspri.

Justin