Sa in kozman l’Afrik i di in n’afèr konmsa é ni konpran bien kan i di kozman-la sa i vé dir l’édikasyon in marmaye sé in travaye koléktif. In vilaz sa sé in l’androi i pé an avoir in bonpé d’moun : na poin arienk papa, momon, lo frèr, la sèr mé nana osi kouzin, kouzine, tonton, tantine, épi bann z’ansien. Arzout èk sa i pé an avoir in saz, in gérisèr, in sorsyé. Dann tout z’étap lo grandisman in marmaye nana plizyèr pèrsone i donn la min. L’èrla lo z’anfan i pé aprann lo réspé pou bann z’ansien, lo bon zèrb, lo mové zèrb, kan la plui i ariv, kan la plui i ropar. Armète avèk sa bann maladi é lo méyèr fason pou géri azot. Ni pé dir, kan nana in vilaz lé konmsa mé kan na poinn vilaz, koman k’lé shoz i éspas ? Si na ponni vilaz, na lo kan, é si n poin lo kan nana lo kartyé. Bien sir, lo bann rolasyon la pa konm dann in vilaz, mé lé aproshan. Alé ! mi lèss azot réfléshi la dsi é ni artrouv pli d’van, sipétadyé.