Lé vré listoir la pa in vérité matématik, la pa in syanss égzakt konm matématik osinonsa lo syanss physique. Lé vré la pa an pozan in lansanb téorème épi zékwassion nou v’ariv a konète dann kèl monde nou va viv domin. Mé listoir sé in syanss umène é an tan ké syanss umène, èl i ède anou konète dann kèl monde nou lé zordi é par la mèm a popré dann kèl monde nou lé riskab d’ète domin.

Mézami mi koné pa si néna inn syanss umène lé ossi mal anségné ké listoir.Listoir lé dann in program lékol, kolèj , lissé épi linivèrssité, mé si ni rapèl anou noute program litoir kan nou téi sava lékol, nou néna konm linpréssion la konéssans la mète a noute porté sé in konéssans in pé étriké ki pèrmète pa nou d’avoir i vizyon larj dsu noute listoir anou.

Astèr si an pliss ni viv dann in koloni (ou sansa in néo-koloni) é si le pouvoir kolonyal épi son bande zassortiman la fé toute pou ké ni koné pa noute listoir. la fé toute pou ké noute listoir la zamé rante dann program lékol, prèss zamé rante dann in program lédikassion é si an pliss noute konéssans istorik la été fossé épi kashyété, donk i fo pa ni étone anou ké noute pèp i koné trépé son listoir é na poin konsyans linportanss listoir-la i pé avoir.

Samedi 26 novanb mwin l’avé la shanss assist in rokonstitission istorik dovan épi ann-dan simetyèr marin lo Port. Sa la éspass dann lané 1942 é kan lo bato Léopard l’ariv La Rényon pou ranvèrs lo pouvoir pétainiste la popilassion portoiz la désside libèr la vil par èl mèm é sé konmsa ké La rényon la été lo promyé téritoir franssé libéré.

28, 29, 30 novnam 1942 sa troi zour inportan pou listoir La Rényon, listoir d’la franss épi pou listoir lo monde é lé si inportan ké plizyèr pèsonnalité la désside form in komité d’sélébrassion é sé an komité ké l’avnir la komémorassion sar fé dann l’avnir.

A bon ékoutèr, salu.