Moin la touzour antann dir, i maryé pa in lapin avèk in karp é la pa bézoin mi fé in désin pou bien fé konprann sak mi di. Sa lé vré dann la vi, an zénéral, épi dann la vi politik an partikilyé. Donk si dé partnèr i fé l’inyon é si z’ot zidé i shas pa ditou ansanm in l’inyon i pé pa dir lontan : désèrtin i di sa in maryaz pou dé zour.

Alor la politik d’inyon ? Zot i koné nout parti la touzour pran so tik-tak konm prinsip. Na dé foi sa la done in bon rézilta dopi lo Crads (komité rényoné pou l’aksyon démokratik épi sosyal) ziska l’aliansé. Mèm kan nou lété vréman dann kré, parti kominis lété lo fron kont in politik ké nout tout i koné é pou in Rényon nouvèl.

Dann in fron, sansa dann in l’inyon, mèm in l’inyon solid tou l’moun lé pa parèy sansa i vé dir ni fé l’inyon avèk nou mèm é sa i amenn ar pa nou loin. Mé l’inyon, sa i fé dsi la baz in program sèryé épi dsi in éstratézi bien klèr. Ni koné dann désèrtin péi sa la bien marshé mèm si la la kass lontan apré kan lo l’inyon té fine ariv o bi.

La késtyonn l’inyon, sa lé dann l’aktyalité pou nou isi La Rényon é pa solman zordi, mé yèr galman épi domin bien antandi. Paul Vergès té i di, i fo in l’inyon pli larz posib : pa in maryaz karp avèk lapin, mé pa in ropliman dsi nou mèm pou gingn trap la viktoir.

NB-Kèl viktoir pou nou ? La libérasyon nout pèp par raport lo néo-kolonyalism, épi in vré dévlopman pou nout péi. Lé bien sinp vi konmsa, mé pli konpliké pou fé rant dann la pratik.