Mé zami, kosa i lé in gard-manjé ? Mi pans sirman zot i koné pars bann léktèr Témoignages I koné in ta d’zafèr. Moin, mi souvien la kaz kan moin té jenn l’avé poin fréjidèr él’avé in mèb avèk in griyaz fin. An plis avèk sistèm-la lo manjé té pa dann in milyé konfiné. Ladan téi mète manjé bien abrité kont bann zinsèkt, kont bann pti souri, épi osi lo shate. Shé zot koman lété zot gard-manjé ? Késtyon pozé ! Mé o fète pou kosa mi di azot sa ?

Sinploman, pars dimansh matin moin la ékout dann in lémisyon rolizyèz in gayar kozman mésyé Prosper Eve profésèr istoire dann l’inivèrsité La Rényon. Akoz mi di té intérésan ? Dabor inn par la form : kozman-la té bien tourné.épizapré par lo fon :
Kosa mésyé – la téi rakont ? Sinploman d’apré sak moin la konpri La Rényon la déza été izolé dann son listoir kansréti dann la guèr 1939-1945. Lété asé izolé dann konfinaz é pèrsone i di pa si domin nout péi lé pa riskab d’ète ankor tou sèl, é oblizé débrouye ali par li mèm. I pé ariv ninport de koi : é si l’avé in dézyèm vag Covid 19 ! É si l’avé in n’ot pandémi ! Sansa si lé zom avèk zot foli i déklansh pa in guèr !

Donk la loson lo profésèr i tir dann listoir la Rényon, sé k’i fo an avoir in gard-manjé é i fo gard ali plin. Mi pans ala in lidé révolisyonèr toulmoun i partaz isi shé nou. Sak la viv la guèr l’Irak i koné koman d’moun – désèrtin-la shoké pou in sasé d’ri. Dann konfinaz nou la vi ankor demoun apré ralé pousé pou zoignon. Pou kosa ? Pa pars nou lé li sovaz ké lé z’ot moun in pé partou dsi la tèr, mé pars nout pèp, kan i ariv, in tablatir konm sak nou la konète, li lé dann lo linsékirité alimantèr é dann in ka konmsa i pé an avoir bann mouvman koléktif irasyonèl.
Nout parti, dopi lontan i rovandik in politik sékirité alimantèr dann l’intéré nout pèp-mi pans sa lé valab pou la plipar bann pèp dsi la tèr - é kozman lo profésèr Eve i vien zis a poin pou rapèl anou in vérité nout listoir kolonyal avèk son politik kontoir l’amenn anou po obliyé. Alor, kansa in vré politik la sékirité alimantèr ? Apré la kriz va vni apré, sansa avan la kriz i mank ar pa vni apré ?