Matant Zélida la ékrir Justin :
Mon shèr nové, mon spès salté,
Fransh vérité, mi konpran pa akoz, bann rouj de fon, i sava shèrch bann z’idé konpliké konmsa. Pars oplis in l’idé lé sinp, oplis li lé éfikas, oplis demoun i konpran, oplis domoun na konm dan l’inprésyon sé li la invant sa, touléka, li noré pi invant in n’afèr konmsa. Tanka zot, bann rouj, zot i koné arienk fé in l’éshafodaz konpliké, pou amontr koman zot lé intélizan é l’moun i pran pa kont in n’afèr konmsa. Aprésa, trouv pa drol si l’moun i intérès pa. Zot i parl dévlopman é l’moun i di : kosa k’i lé sa ? Zot i parl dévlopman dirab ? Le moun i domann : kosa k’i lé sa ankor ? Dirab épi solidèr ? lo moun i pans : plizanpli konpliké ! Alor, mi dout pa na d’moun intélizan rantre zot, mé si lo l’intélizans lé mal partazé, kont pa dsi lo moun pou suiv azot. In sans, i vo myé i suiv pa zot ! Pars zot lé kapab ral demoun dann malizé. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Si ou té i égzis pa, noré fali invant aou.
L’idé d’dévlopman i fatig aou ? Poitan, i fo pass par la si ni vé trouv la solisyon nout problèm. I mank travay, é bin, si i vé trouv travay pou d’moun, i fo fé l’antroproiz, mète an valèr nout tèr, alé rode poison dan la mèr, fabrik nout l’énèrzi, fé nout dé gran sèrvis, fé travay nout tète, kas bann frin lo dévlopman. Kass bann monopol ! Dévlopman dirab ? Biensir, nou la bézoin tiliz nout prop rosours san gaspiyé, san détruir. Konmsa mèm nout dévlopman sar dirab ! Solidèr ? Bien antandi, nou la bézoin sa i fé an solidarité, dan lo partaz. I fo pa in pé i anprofite dsi lé zot, mé i partaz myé posib : sa mèm la solidarité. Ekèl koté i fo fé sa ? Pa inn-dé plas solman, dan tout La Rényon, dan tout konpartiman l’aktivité. Myé ankor, dan bann péi nout l’antouraz : sa mèm i apèl nout ko-dévlopman. Sa lé konpliké ? Matant, moun vilin na ankor, moun kouyon na pi. Sa in n’afèr bann Rényoné lé bien kapab konprann. Nou lé kapab ! Tok ! Pran sa pou ou !

N-B : Sanm pou moin, si mi tronp pa, sa mèm lo l’éspas global lo dévlopman dirab é solidèr.

Justin