Mézami, si mi tronp pa néna pliyèr zafèr bann rényoné lé dakor rante zot pou fé épi lé pi dakor pou kontinyé lé shoz a vo lo konm zot i lé dopi in bon koup de tan. Pétète in pé va panss sa sé in kapriss mé fransh vérité, mi oi sa plito konm in lam de fon pou avanss diréksyon lo shanjman.

Kossa ni vé par l’fète : ni vé lotonomi énèrzétik, ni vé galman lotonomi alimantèr, ni vé in sistème santé pli éfikass pou fèr fass bann katastrof anonssé, ni vé lo dévlopman dirab, ni vé ankor in lékol rényonèz, épi in vré kitir rényonèz, ni vé do koi nouri noute matyèr griz. Opliss i sava, o pliss ni souète in bon lankraj dann loséan indien nout mond zéografik, ékonomik, kiltirèl natirèl. Mi panss sa sé in mond nouvo apré lév doboute.

Lé vré lo lansien mond lé ankor la. Lé vré li kroi pa zamé nou nora bann solisyon marké an-o la. Lé vré zot i éspèr lansien mond nora assé lo souf pou ropouss lo mond nouvo. Mèm si zot i yèm pa tro sa, zot i éspèr lo mond néokolonyalizé sar assé for pou rézisté. Mé kan va fé lo bilan, kan va fé lo rapor dé fors, kan va bien soupèze lo poi lo nouvèl mantalité épi lo nouvo léspoir, mwin lé sir nou va oir lo mond nouvo i péz pli lour ké lo lansien.

Alor dann sé kondisyon nou va rand anou kont lo léstatu koméla i doizète shanjé, révizé, pou pèrmète l’anvol lo monde nouvo. Pou in monde nouvo, pou in Rényon nouvèl.