Lo nouvo prézidan Konsèy réjyonal la trouv dann son korbèy batèm toute projé lo lansyin l’avé fé, plis lo larzan li l’avè prévi pou fé bann projé-la... an parmi larzan zakor matignon. Kèk milyar mi pé dir azot ! Toute lété paré, téi rèss aryink motèr pou fé pété. Élas, ménélas, li la déside kass toute, é ranplas sa par in bann konféti projé la mèm pankor kalkilé, é in route an kornish va fé, in zour si i fé, konm demoun i di "a la mi-out an mé".
Mi mazine, konm moin, zot la antann parlé. Sa lé dan la bib é n’inporte-a-ki i pé rann ali kont par li mèm. Ni pé rakonte sa konm in zistoir, ni pé komans par "l’avé in foi !". Donk l’avé in foi dë frèr, inn té i apèl Ésaü, l’ote té i apèl Jacob. Pou fèr kourt, lo premyé la vann son droi di promyé né lo dézyèm, pou in pla lantiy. Aprésa, toute lo byin son famiy la pass sou son né, é l’ote la ramass lo toute, pars la loi té konm sa dann tan-la…
Lé vré zistoir sé zistoir, lézann sé lézann é konparézon la pa la rézon, mé… la pa loin. Pou kossa ? Pars gouvèrnman i suiv l’afèr kom lé dsi l’fé, ziskatan, in kou d’pate é li ramass la miz li arpran larzan li la promète. Kaziman in léritaz pou in pla lantiy.

 Justin