Oté

Pou in vré lotonomi alimantèr avèk konm prinsip : kont pa dsi baton tonton pou travèrs la rivyèr

Justin / 22 zanvié 2021

JPEG - 43.6 ko

Somenn dèrnyèr mwin la partisip in kozman dsi lotonomi alimantèr. Lotonomi alimantèr ? Dizon pou mwin konm pou in bonpé d’moun sé la sityasion d’in péi, d’in landroi, sansa d’in réjyon, lé kapab donn manzé-boir an sifizans, an kantité konm an kalité, son bann zabitan par son prop mwayin. Mi panss ni pé di sa konmsa.

Mé alon kant mèm port in pé antansyon sak ni di : Dann déssèrtin péi i vann pétrol pou ashté lo manzé-boir. la néna la sékirité-la ? Ni pé di oui, sof si lo pri pétrol i koul in kou é lo péi lé bien moungué. lotonomi alimantèr i koul galman. Donk dann in ka konmsa, si lo lotonomi lé frazil, ni pé pa dir li lé assiré, donk la poin in vré lotonomi alimantèr.

Alor lotonomi alimantèr i pass par in prodiksyon sifizant an kantité épi an kalité dann lo péi, tout sak lo moun la bézoin pou ranpli lo bouzaron épi garanti son kroissans épi son santé… Ni pé poz anou konm késtyon : si ni parl nout prop mwayin, kossa sa i vé dir ?

I vé dir dann lo péi néna in lagrikiltir, épi in lélvaz, épi si possib la rivyèr, la mèr pou pèsh poisson. La foré pou alé rode lo frui zoizo la planté pou nou konm gouyavyé, konm frèz dé boi, épi rézin maron-sa la fine détrui sa zordi - Mi donn solman dé troi légzanp, mé sak lé sir sé ké néna ankor bonpé.

Mé nou, la Rényon, zordi, in lékonomi d’ transfèr i assir inn parti nout sibzistanss é sa sé in n’afèr i plé pa in bonpé rényoné. Sé pou sa ni oi La Rényon domin avèk in vré plan lotonomi alimantèr, é in roganizassion la prodiksyon pou amenn anou ziska lo bi nou la mark an-o la..avèk otan ké ni pé in prodiksyon bio.