Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité, kossa mi antan, kossa mi lir par plass dann zot torshon rouj, dann lo Témoignages dé malèr ? Mi antan dir zot i vé viv dann l’otonomi alimantèr ! Mézami, kouk sé sa, zot tète lé pa bon, zot i sava pa la boutik zot don, zot i koné pa koman demoun i viv don, tout sak i pouss sharyo dovann zot dann gran sisrfass ?zot i oi pa l’moun i rode arienk ranpli zot boujaron avèk bann marshandiz i sort déor solon zot moin shèr épi méyèrkalité. Mèm, i bataye konm lo shien kan na poin assé pou zot fé zot komissyon an sold. Zot i oi pa bann fime dann fassbouk ? In tan téi di avèk lotonomi nou va manz galé, astèr va di in pé i vé ramenn anou dann tan manyok èk patate, sansa mayi avèk gro poi. An touléka, vi oi mon laz, moin la fine tro konète sa. Alor kont pa dsi mwin ! Si zot i vé, pran toutt é o bliye pa manz patate avèk la po. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, mi antann aou mé mwin lé loin d’ète dakor. Pou kossa ? Sinploman pars matant l’otonomi alimantèr la pa ditou in rotour an aryèr, lapa ditou ar manz lo rosh, ni manz manyok-patate solman. Mi oi sa konm in bon prodiksyon an kantité, an kalité, épi an varyété, avèk an pliss réspéktyé nout tèr, réspéktyé nout lo, nout bann rivyèr épi nout loséan indien. Matant, la nouritir biolozik la pa in jirman sa, an kontrèr sé in manyèr pou bien viv.. Armète an pliss avèk sa la pèrmakiltir, l’agro forèsteri, épi donn travaye issi La rényon pou bann ti kolon épi pou bann pti plantèr. Par dsi lo marshé, sa i marsh bien avèk bann roshèrch, bann zantroprie pèrforman pou mète La rényon anlèr.A ! Bien sir wi koné toussala, madré konm wi lé, mé wi fé sanblan wi gnor. Antouléka éskiz mon pardon, mé lapa bann moun koko dir konm ou ni adrèss. Ni adrèss sak issis shé nou épi dann nout voizinaz i konpran lé shoz i pé pa kontinyé alé an sharète shaviré konmsa. Tok ! Pran sa pou ou.