(Page 16)

Lé vré lo démaraz protokol Kyoto é lo komansman lo travay bann zégspèr i tonm byin ansanm. Mé lo saroyaz la pli nou la ginyé sé osi in signe for pou tout sak i ral déryèr an dizan lo sanzman klimatik lé abstré.

Ankor, sa sé ryink gro grin d’pli. Kosa va arivé kan nou va konète nout proshin gran syklone ? Zordi la pli i tonm in zourné é bonpé kaz lé plin la bou, térin i sava, ravine i débord, loto i giny pi roulé, somin i sava par boute. Kosa i sra kan la pli va grinn diran in sominn, dé sominn ?

Nou pé ét sir va rivé, akoz ni koné déza bann syklone sra pli gro é nora plis ankor ék lo résofman la tèr.
Si ni sanz pa nout bann modèl dévlopman, si ni porte pa atansion tout bann signe for i ariv ansmoman, mi koné pa domin kèl planèt nout bann marmay va konèt kan zot nora l’az Paul Vergès.

I fo nou fé tout sak ni pé pou adousi so dériv lo klima. Mé i fodra d’zané, omoins in sièk, pou raminn tout kom lété lo sièk dèrnyé. An atandan, i fo ni pans aranz nout lanvironman, i fo ni adapte anou a so bann nouvo kondision nou la amné.

Justin