La réponss ? Mon bann dalon la di amwin sa sé in mlizine é bonpé d’moune i travaye dédan… Alor mwin ma pran labitide rogardé pou konprann é mwin la romarke dann landroi mwin lété l’avé boudikonte bonpé lizine é sa téi don etravaye bonpé d’moune.Mwin la vi lizine chokola ! Mwi la vi lizine pou rékipèr bann métal ! Mwin la vi lizine karton é d’ote é d’ote ankor.

Mwin la kalkil mon péi émwinla di an mwin-mèm : « La pwin toussala dann mon péi é néna trépé lizine é la plipar d’tan ni fé linportassion in pé toute zafèr ni produi pa é sé la k émwin la romarke in péi dévlopé avèk in péi maldévlopé lé pa parèye. Lo dévlopman sa i fé lanploi lo maldévlopman i fé trépé d’lanploi é sé pou sa nou lé kondan ékan ni koz lanploi ni oi bann voiyan rouz é ni oi konm idi : lnploi sa lé rar konm kornlapin pars imanke anou toute in lékonomi d’prodikssion ésa sé in n’afèr nou la pwin. Dann tan nou l’av éin pé mé astèr nou na pi é sé sa k’i fé noute féblèss.

Méssyé Vals ou lé la rényon koméla. Ni konte pa dsi ou pou dévlope noute lékonomi mé ni souète solman réini bann demoune néna dé zidé dsi noute dévlopman é pou mète sa an marsh mé sof oute réspé mi kroi arienk bannrényoné i pé mète sa an marsh. Ni domann pa ousa pârs d’apré mwin étan d’laba i fo p konte dsi ou pou fé dékol noute lékonomi avèk in plan fé par bann rényoné pou bann rényoné.

Abon antandèr salu !