Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo vré mason. Mé zami, zot i koné néna in bonpé provèrb i tourn i rotourn otour d’la késtyon lo mansonz. Konmsi lo moun i pé pa s’anpass mantir, mèm si i koné lo mansonz i poz plis problèm, k’aport bann solisyon. Bann zalman i di pa : lo mansonz néna la pate kourt ? Mon léspèryans pèrsonèl i indik amoin i fo évite mantir, pars apré, sé pa pou kosa, toultan ou lé oblizé zistifyé aou é sa sé in n’afèr lé bien konpliké. Mé tazantan i fo manti sirtou kan la vi d’moun, sansa zot sityasio lé dann danzé. Par l’fète i vo myé pa mantir, sof dann inn-dé ka partikilyé. Alé ! Mi kite azot rofléshi la dsi é ni artrouv pli d’van. Sipétadyé.