In son dann in mizik, in note, épi nout kèr k’i bat tanbour. In mo, in lékspréssion, sou la plime bann zékrivèr La Rénion, dan la boush bann rakontèr zistoir. In réspirassion dann bal tamoul, épi lo batavèk, bob avèk kayanm bann maloyèr, séga, slam, fonnkèr, hip-hop, kabar, épi lo rèst... Nou lé kontan, ni viv kolé sanm nout péi, ni antann son kèr, mé ni vé pa lé z’ot i arèst dann la fénoirsité, sirtou bann zènn, bann marmay :

Méssié lo réktèr - rédiktèr, rédiktèr la tète bann marmay La Rénion, rouv la port an gran, pa an misouk an misoukant, pa la port la kizine, mé la port par dovan, pou fé rant nout kiltir dann lékol nout péi. Ni siplik pa ou pou sa. Ni souplègn pa èk ou. Ni siouplète pa ou non pli. Ni di aou solman pran la klé la pa ou, rouv la port-la pou nout bann marmay an avoir lo droi la kiltir, nout kiltir, z’ot kiltir.

Nou lé la, kèr klèr, lo kèr dan la paix, dé min rouvèr. Mé si i fo, lo doi lé kapab fèrmé pou donn lo poin, épi lo kèr lé kapab dirsi pou vni lo rosh, pou kassé, pou brizé, pou kassé-brizé...

Justin