Alors, lizine kann lé pi anou. Lizine éléktrik bagass-sharbon lé pi anou non pli. Bann sant reshèrch pou kann la fine pass dann bann min étranjé. Bann lotèl, la gingn prime déssi avèk nout larzan, bann moun déor la fine ashté an sold. Ala éstèr k’i vé fé anou in zanfan dann do, kapar. Edéna, san diskite avèk la komine Le-Por, mèm si sé èl lo propriyétèr la sours Blansh épi la sours Déniz. Arzout èk sa bann gran sosiété d’famiy i shanj de min, sansa i kass par boute.

Pou aranz tousala, ala k’méssyé Préfé i fé lo zantiy avèk bann pétrolyé. Ala k’i goumant lo pri a la domann san mète an plas in pti komansman la konkirans. Armète la-dsi k’i domann bann Morisien pou vni admir in plan Gerri, la fine tou déplimé, é i rès ar pi arien dédan si i kontinyé. I fé pass banna déssi la rout Tamarin, pou fé montr banna gayar nou nana, mé gayar nou nana lété pli sirman lo tram-trin, la mézon dé sivilizasyon, la nouvèl rout litoral épi lé z’ot projé té i sava fé é lété pankor fé.

In tan, lo pti prézidan la Répiblik, avèk son Promyé minis, épi son minis Lékolozi, té i di La Rényon i sa sèrv modèl pou dévlopman dirab. La té i di ziska nou nana in syèk an avans par rapor la France. Té i di ! Mé ala k’pou in sinp rézon politik, i déside fé pèrde anou l’avans nou nana. Pli pir, i pans bann Rényoné i rann pa zot kont sak i éspas. Mé pou kossa i pran anou don ? Mi jur lé pa marké kouyon déssi nout fron.

Justin