Pou nou kréol La Rényon, lé pli fassil, la loi sé zandarm avèk la poliss.Donk sa i évite anou fé l’éfor konète donk aprann, ni vèye zandarm é si li di anou, ni pé fèr tèl shoz, ni koné la loi i sava dann tèl sans.si li di anou lé défandi, ni koné ni sava dann sans kontrèr lo tèks de loi. Donk pou nou lo ladaj : « Nul lé sansé ignor la loi ».Finalman nou néna arien a fèr avèk sa, sirtou lé pa néssésèr kass nout koko. ni domann la loi –donk zandarm avèk la poliss- sak i pé fé é sak i pé pa fé épizapré ni koné .Sé konmsa ni koné la loi. Anfin sé konmsa ni kroi ni koné laloi, pars kan nou lé pri dan larozoir néna poin pèrsone pou tir anou.

Mé antansyon d’apré zot la loi èl mèm-donk poliss épi la zandarmri- kissa zot i sava rodé pou égzèrs zot pouvoir d’loi ?Néna dé zandroi lo laplikasyon lé fassil, konm par ébzanp, dann lékol, dann bann biro, dann la sirkilassyon,an parmi l’moun la pèr la loi, anparmi demoun i réspèk la loi pars pou zot la loi lé réspéktab.. Mé landroi la loi li-mèm i fé pa pèr, épi lé pa réspékté, ébin lo moun i réspèk pa pars toutfasson mi kroi pa va vni oir azot pou di azot zot i réspèk pa la volonté zénéral é kan méssyé lo préfé, méssyé lo prézidan,méssyé lo mèr, i vé fé aplik in loi kont lo moun san loi ébin lèv bonèr, dor tar pars sé in n’afèr la pa fassil ditou .. Mète l’amand ? mète aou, si ou lé pa kontan ou na ka pran konstan.

Mi di sa pou plézanté pars final de konte mi koné dann katrovin pour san dé ka, la loi lé apliké.I rèss pétète lo vin pour san lé problématik é toute bann loi ké néna-poliss, zandarm, douanyé etc... Si zot i travaye pou tyé lo kor, pétète zot va vnir abou arsouk ankor sink pour san sak i shap la loi. Donk va rèss touzour in ta, avèk in pakéva fione avèk la loi.Alors si zot i vé réponn zot mèm késtyon mwin la mark an-o la, pars mwin lé for pou poz késtyon, tré pé for pou répond. Ni artrouv pli d’van si plète a Dieu.