Koman i kont demoun dann in sal ? La pa si fasil ké sa. Mé lé posib, si ou i pran bien prékosyon. La polis na son manyèr konté. Zournalis na son manyèr osi. Sak la organiz in maniféstasyon na son manyèr galman. Si demoun lé asiz, ou i kont la shèz. Si demoun lé dobout, i kont tan par mèt karé, i mézir lo l’androi sansa i fé o zizé épi i miltipliy inn par l’ot. Moin na mon manyèr amoin, m’a ésplik azot sa d’in’éstan.
Pou kosa mi di sa ? Pars dimansh, lo fronn gosh la fé in gran manifèstasyon dann Paris. L’avé d’moun ! Té foulé mi di azot. Banna té i atann trant-mil moun, é pou fini l’avé plis san-mil, mèm san-vin-mil suivan sak bann z’organizèr la di. Mé Rényon Promyèr la déklar l’avé plizyèr milyé d’moun. Pou kosa li la pa di plizyèr dizèn milyé d’moun ? Pétèt pars li fé toultan konmsa : diminyé lo nonm manifèstan si sé pa l’UMP ki réini. Solman kan Sarkozy la fé son gran rényon, zot la di nana soisann-dis-mil moun... dann in sal i rant trant-sèt-mil.
Dimansh, Mam Bello la fé in rényon la fontèn Sin-Pol. Bann zournalis la vi in bonpé santèn fanm — an parmi l’avé Danyèl Alamélou ! Vinn katrèr apré, désèrtin zournal la vi sis-san pèrsone. Lé bien ! Sof ké dann sal-la, i rant pa plis dé-san. Donk nana konm in l’érèr d’kontaz ou sinonsa in manyèr fé mont la mayonèz. Bou di kont, RFzéro, ou sinonsa Rényon Rromyèr sé topèt-morèt, kif kif bouriko boit d’zalimèt. Pars finalman, i fo fé in propagann kont Parti kominis. Banna la aprann sa dépi lo tan dann vant zot momon.

Soi sé in maladi, soi sa in rèst la mikrobi, moin na in romèd pou zot. Di pa sé moin la di, mé mon romèd lé pliské éfikas. Mon téknik lé patanté. Donk, pou kont in foul de moun, lé sinp : kont lo nonm la pat nana épi diviz par dé. Zénéralman, lo kont lé bon !

Justin