Lo promyé la arète koté in mar épi li la mète a pèsh poisson.Kan son filé té fine plin, li l’avé soif.li la zète tout lo bann poisson dann lo mar épi li la parti la kaz lo vyé pou boir in pé d’lo. Lo vyé la domann ali :

« Ousa i lé poisson ou la péshé ? »

Li la réponn : moin la armète azot dann lo pars la soif la trap amoin é moin la vni vite pou boir in pé d’lo. » ;Lo gramoun la mète an kolèr é la domann ali :

« Ou téi gingn pa boir dolo dan la mar ? »

lo marmaye kouyon la réponn li l’avé pa pansé.

Dézyèm marmaye kouyon l’arivé.lo vyé gramoun la domann ali ousa lété son bann paké la kord,Li la réponn li l’avé poin la kord pou amaré li la vni la kaz lo vyé pou li pran in kord pou amaré.Lo vyé la di ali :

« Akoz ou la pa ansèrv out bann kord shoka pou amar lo paké kord. ? »

Lo dézyèm marmaye kouyon la réponn li l’avé pa pansé.

Lo gramoun la grongn ali mé sak lé fé lé fé é i gingn pa rotourn an aryèr.

Lo troizyèm marmaye kouyon la grinp dsi pyé koko é la di avèk son baton :ou va fé tonm tout bann koko la !

Apré li la désann é kan li la sèye anvoye son baton anlèr pou kass koko , li la pa gingn kass lo bann koko.Li la rotourn la kaz lo vyé épi li la rakont son zistoir.L’-èrla lo vyé la di ali/

« Vik ou lété dsi pyé koko, pou kosa ou la pa kass koko avèk out min ? »

.Li la réponn : « Moin la pa pansé ! »

Lo vyé rouz avèk la kolèr la grongn ali mé konm li osi li lavé troi fiy kouyon konm la line do mars lé ron li l’arète vitman épi li la rant dann son kabane é li la mète a kalkilé .

Kriké ! Kraké ! Kriké Mésyé ! Kraké madam !

- 

Lo vyé la kalkil tout in nuite épi landomin li la di.

« M’a fé kant mèm in n’afèr pou zot.Zot va maryé avèk mon troi fiy lé boushé konm lé pa posib. »

Maryaz la bien passé é la pa tardé pou gingn zanfan, pars pou sa, la pa bézoin sort dannn bann gran zékol.Tou lé zan la gingn zanfan é la pa tardé dann l’androi l’avé in vilaz demoun kouyon.Aprésa la vni in dzyèm vilaz, épi in troizyèm, épi tout i réjyon demoun kouyon.

Aprésa zot lété si tèlman nonbré sak lété soidizan intélizan la pa gingn fé arien kont lo moun kouyon épi tousa la mélanzé.

Si tèlman ké zordi néna plis demoun kouyon ké demoun intélizan é tousala la parti dann lo mond antyé é sé pou sa i trouv azot zordi é an kntité siouplé fané in pé partou dann lo sink kontinan..

Si zistoir lé mantèr lapa moin lotèr.Koton mayi i koul é rosh i flote .L’avé inn foi pou inn bone foi, mésyé lo foi la manz son foi èk in grinns èl

Zistoir la fini
Justin

NB bann granpèr épi bann papa obliy pa rakont sa bann marmaye .Sa in bon manyèr pou konprann la vi.