L’inssee lé la é son bann zékspèr téi i pé réponn son késtyon. La shanm de komèrs, la shanm métyé, bann sindika lé la donk li pouvé pa prann in déssizyon a l’avèg. Sé an konéssans dé koz ké li la fiks lo bann pri.

I di la SRPP néna in rézèrv dé-troi moi bann produi pétrolyé donk li la pi poz ali in késtyon sinp, li noré pi dir, kossa v’arivé si mi désside gèl lo pri bann produi pétrolyé n atandan la guèr i arète-pars la guèr té pa prévi pou dir ad vitam éternam… A ! biensir li noré dévir lo do avèk in métode l’éta lokal la mète an plass pou fiks lo pri moi pour moi. Pli grav sansa mwin grav sak l’arivé ?

Sa i mérite in roflékssion sèryé, pa in déssizyon mékanik konmsa, sirtou ké lo rézilta lété koni d’avanss é téi sava plonj la popilassion dann bonpé difikilté.

Astèr zordi sak i éspass lé pa zoli-zoli ni pou bann konsomatèr lanmda, ni pou bann plantèr, ni pou la vi ékonomik an zénéral é sirésèrtin avril sar in mové moi pou in bonpé dmoune La Rényon… Biensir lo fon d’lafèr sé sak la fiziye lotonomi énèrzétik lé résponsab. Mé i falé vréman pran in déssizyon konm sak léta lokal la pri san prann an kont la réalité lokal.

Antouléka wala in déssizyon domazab pou la popilassion rényonèz, pri par léta lokal san nyanss, san pran kont la réalité,. Bonpé rényoné i sava soufèr avèk sa.
A bon antandèr salu

Justin