Donk zordi lindi, mwin té apré rode in sizé pou zoinal mardi é mwin téi trouv pa inn téi bote amwin pou vréman. Ziska l’èr mwin la mète mon radyo dsi France Inter, é mwin la antande in madame proféssèr apré anparl de nou-bande homo sapiens, nou bande zom modèrn – é anparl noute bande zansète. Madam – la i sorte fé in liv dsi lorizine l’om modèrn, donk dsi noute lorijine é el la di plizyèr zafèr lé drolman intéréssan pou bande mélanjé-métissé konm nou… konm la plipar d’moune an zénéral dsi la tère. Métissaz sé l’avénir dé l’om.

Dabor èl la di in n’afèr le moune rassist i dovré rofléshi dsi : Bande zéropéin in gran koupe de tan l’avé la po fonssé, épi lo zyé blë. Kan la domande aèl pou kossa la shanjé, èl la réponde pars bande zéropéin la shanj manyèr manjé-moinss vitamine b dann zot manjé – épi pars in vag bande migran la po klèr téi sorte moiyin-oryan é l’ariv dann lokssidan. Sa la sifi pou zot po klèrssi d’apré sak lo madame i di.

Dézyèm zafèr èl la di : na pwin arien lé bon konm lo métissaz épi lo mélanj pou in group umin bien défande ali. Par ébzanpe dann in lépidémi, si kan èl l’arivé, déssèrtin l’avé in dispozitif pou protèj azote ébin lo groupe la gingn pass an travèr lo lépidémi é li lété sové – mèm si li la lèss in bonpé demoune dossi lo karo é néna sak lé mor épi sak la réshapé pou rokonstityé lo groupe. Lé pa bon pou in popilassion kan li lé izolé, san bande z’apor nouvo, san bande migran – pars l’om modèrn la pass son tan pou migré é la pa arienk zordi sa la komanssé – lo groupe lé frazil é li pé disparète.

Alor in késtyon : pou kossa si noute toute lé kouzin-sansa frère-pou kossa ni divize anou konmsa ? Pou kossa ni rofize lo métissaz-mélanzaz alé oir sé sak i fé ké lumanité lé zordi konm li lé, nonbré é bien armé pou rézisté ? Pou kossa la koulèr d’po noir lé mal konsidéré par déssèrtin alé oir la koulèr la po i vo pa intélizanss, la rézistansss, la kapassité pou adapté, lo bon fon épi lo mové fon ? La koulère la po sé la koulèr la po é i f opa alé rode la-dan dé shoz i égzist pa.

Pétète sinploman pars néna dsi la tèr demoune i kroi bande téori totalman fo, é bande moune-la lé inpèrméab par raporte la syanss é sak èl i amontr anou dopi dé zané é dé zané-ziskatan k’in zour ni pé éspèré la kouyoniss in pé va kass par boute.