Médame zé méssyé, la sosyété, ze koze èk mwin sé koze avèk in kouyon, mé sé o pyé d’lo mir k’i oi lo vré masson. Mézami, la sézon la shass lyèv i sorte rouvèr é bien sir band shassèr la fé shou blan. Konmsi issi la Rényon, koméla, l’avé ankor lyèv pou shassé. Sa sé pou kozé sinploman, mé pou arvni dsi noute proverb é san parl ni lyèv ni shien, ni vyé, ni pé dir dann toute zafèr i vo myé fé apèl in moun éspérimanté, kaziman in moun k’i koné lo maniman la manivèle. Pou koué ? Pars avèk li wi pé z’ète sir li la fine oir in pé toute sityasion an kouyon, li koné sak i fo fèr, é sak i fo pa fère é noute toute i koné sa sé in n’afèr lé pliské néssésèr. I di pa in vyé véra i boure pa son né dann zépine sitron, pars in jenn véra li lé riskab fé épi gingn son rèss trankil. Alé ! Mi arèss tèrla é mi kite azot rofléshi la dsi. Ni artrouv pli d’van. Sipétadyé.