Pars boudikonte kan wi sava rogarde la kouvèrtir bande zinportassion par bande zésportassion, ou lé pou gingn kafar,sa lé sir. Pars inn linportassion i koz par kou d’milyar l’éro, é l’ote, lésportassion i parl sinploman par milyon é anpliss ké sa, si l’inn i goumante touzour, l’ote i arète pa diminyé.

Ni pé domande an nou-mèm pou kèl rézon lé shoz i éspass konmsa dopi in takon d’zané. Si ni parl dévlopman lo band shif i réponde anou mal-dévlopman, sansa in dévlopman an dézékilib. Si ni di lo sistème tèl ké li lé, li lé pa tayé pou amenn anou dann shomin lo dévlopman, touziss si in pé i mète pa l’otèr dsi nou mèm, dsi noute bande politik, dsi noute bande noute zantropriz.

Mézami si mi di azot néna déssèrtènn zantropriz i marsh bien issi La Rényon,néna dé réissite individyèl, sa lé sir, mé sé l’ansanb k’i marsh pa an solidarité lé z’inn avèk lé zot, in sèktèr avèk toute lé zot é si i kontinyé konmsa, si i tir a-u épi pi a-dia, lo tan va passé mé noute dévlopman nou lé riskab rogarde sa dann in trou.

Mwin pèrsonèlman mi rogarde bande péi konm Maurice, konm Sésèl, mèm madégaskar zordi, é talèr la répiblik komor -inn foi k’li sar fine dékolonizé par la France-, mwin néna konm l’inpréssion banna i avanss é va kontinyé avanssé é nou, dann méyèr dé ka, ni rèst an plass, pli pir ni bate aryèr. Dann tan paul Vergès nou la rate lokazyon é zordi ni rovoi pa lokazyon-la roprézanté.

Mi koné noute parti li domande toulmoune i mète dakor pou ariv a fé in loi d’dévlopman é li lé toussèl a domande sa é lé zot non, zot i intrèss pa trop : shakinn i okipe son séktèr, shakinn i vé son kota d’réissite,mé la réissite global mi san pa néna in volonte pou toulmoune tir dann lo mèm sans-lo sanss lintéré zénéral bien sir.

A bon antandèr, salu.