Tou lé zour, shak zour, mi romèrsyé bann savan, bann téknissyin, bann z’inzényèr, bann moun byin instruiyé, sak i èm bour lo né partou, pou an avoir trouv bann z’afèr pou shanj nout vi an byin.
Tou lé zour, shak zour, mi modi bann savan, bann téknissyin,bann z’inzényèr, bann moun byin instruiyé, sak i èm bour lo né partou, pou an avoir fé vnir, sansa invante déssèrtinn shoz la pouri la vi d’moun déssi la tèr. Mé anparmi, na in ras mi modi plis ankor, sé sak i pouri la vi d’moun dann in l’androi épi i sava, i dévir lo do.

Zordi, mi pans, bann moun la déside pou atak shikungunya, bombarde partou bann zinséktisid sak la tyé bann ti-zoizo, bann ti poisson épi ankor bann moush a myèl olèrk tiliz lo BTI, in l’inséktisid ékolozik.
Mi pans galman sak la fé vnir, issi La Rényon, bann léskargo-manzèr léskargo, pou tyé bann z’agatine épi lo manzèr an késtyon konm z’agatine té gro pou li, la profèr manz bann ti-kalité gastéropode, tyé in bonpé épi lèss bann gro léskargo byin trankil.
Mon pansé i sava ossi pou bann la larg moush blé, san pran prékossyon konm i fo épi i lèss anou priyèr bondyé, Pou prézèrv anou kont in katastrof nou la pa rodé. Parèyman, bann moun la fé lo promyé route an kornish, bordmèr, olèrk fé pass ali déssi la montagn, sak la fé vnir fourmi rouz pou manz borèr kane, é krapo pou manj fourmi. Sak l’amène vèr blan La Rényon, la fé vnir mèrl moris étsétéra-étsétéra-la ké lo ra.
Mi souète, pou sak lé ankor vivan, zot nana konm in rogré, mé mi krin zot la dévir lo do, la konsyans byn trankil… arvoir Pyèr, tak baro !

Justin