La radio la anparl de sa. Bann télé la amontr z’imaj zot bann rogardèr. Biensir, bann zournal i sava amontr sa zot bann léktèr, an long, an larz épi an travèr. Kossa i lé sa ? In kab sou-marine pou distribyé kouran rant La Possession épi Sin-dni. I parétré, sa inn promyèr foi i fé in n’afèr konmsa dann l’oséan indien. Trann sink kilomète lo kab épi 2100 tone pou déroul dann fon l’oséan indien. Anplis ké sa, in robo pou anfons lo kab dan la sab.

In bon n’afèr pars lo kab i pass ar pa anlèr mé dann fon la mèr. Lé myé pou lo péizaz ! Lé myé ossi par raport bann siklone vi k’i prévoi bèl-bèl siklone plizanpli for, par raport l’éshofman klimatik. I di ossi, dann son parkour, lo fon la mèr lé pa intérésan pars nana arienk la sab. Pa intérésan ? Sète-la i rèss a prouvé.

I di ossi, dépi katran l’apré prépar se l’opérasyon-la. Katran ? Donk, avan k’i déside fé lo santral o fioul pèrsone i vé pa, sof l’EDF, gouvèrnman épi bann pétrolyé. Sa i vé dir, banna la diskite pou la po d’patate èk nou, mé sa i fé in bon koup de tan té fine pran la désizion fé santral sal-la. Pars, dann tousa, inn i sava pa san l’ote. Pou koué poz in kab ote tansion l’androi-la si la pankor déside produi kouran La Possession. Nora pi déside désantraliz la prodiksion ? La pa sak lété fine désidé, é la mor Gerri lété bien fine programé.

Lé normal pars, konmsa, bann pétrolyé lé kontan. EDF i bingn dan la joi. Gouvèrnman, parl pi, é lo zéléksyon Didier Robert i rant dann l’éstratézi-la. Pou lo réstan, la kominikasion i fé son boulo ; Fé prann demoun blan pou noir, makaroni pou la bouzi, savon pou fromaz.

Justin