La Frans la gingn son match kont La Roumanie. I fo koz de sa sansa non ? Pars pou in pé ala in tré bon nouvèl k’i rolèv in pé la répitasyonn lo péi, é pou d’ot sé pa forséman in bon nouvèl, mé in manyèr pou détourn l’atansyon lo bon pèp dsi z’ot sityasyon ké la pa ditou sète in poul zèf an or.

Pou in pé sé in bon nouvèl pars sa i amontr ké dann in l’éspor popilèr konm foutbal lo péi nana son gou d’sèl é ala ké zot i mète a kroir ké sé zot ki zoué a la plas bann zouèr. Nou la gagné ! Nou la gagné ! Pou nou, bann néo-kolonizé osi sé in gran l’onèr é zot i mète a shanté an kèr : nou la gagné ! Nou la gagné ! Nana bien lontan bann z’anprèr romin té i pans si i done bann romin lo pain épi lo zé d’sirk ébin l’asé pou kontant azot.

Pou d’ot la pa in si bon nouvèl ké sa, pars gouvèrnman lé pa kapab trouv lo bon solisyon pou règ bann problèm demoun é li pans lo bann match va kontant lo moun é konm di lo kont sar in moiyin pou fé pass lo pilil mèm si li lé amèr. Lo gouvèrnman i pans konmsa li va fé gingn fé pass son mové loi travaye an parmi lé z’ot margoz amèr.

Nou rényoné la-dan, kosa ni pans ? Lé bien dir an avoir in pansé ki sré pa kontaminé par lo l’évènman. Sitou ké lo méyèr zouèr sé in rényoné : Dimitri Payet ! Ni obli mèm ké son mérit lété rokoni par bann z’anglé bien avan ké par bann fransé. Pou moin konm pou d’ot Payet sé lo méyèr mé la pa pou sa moin va vote Hollande ankor in kou é lo gouvèrnman sré bien mal avizé si li kroi li va tirpou li lo grinn jak dann fé.